ڈھاکہ،یکم فروری(ایس اونیوز/آئی این ایس ا نڈیا)بنگلہ دیش میں سکیورٹی فورسز نے ایک شدت پسند گروہ سے روابط کے شبے میں چار افراد کو حراست میں لے لیا ہے۔ ان پر شبہ ہے کہ وہ گزشتہ برس ڈھاکا کے اس کیفے پر ہوئے حملے میں ملوث تھے، جس میں بائیس افراد مارے گئے تھے۔ ڈھاکا پولیس نے بتایا کہ ’جماعت المجاہدین بنگلہ دیش‘ نامی جنگجو گروہ سے تعلق رکھنے والے ان افراد کی عمریں اکیس اور اٹھائیس برس کے درمیان ہیں۔ ان گرفتار شدگان میں اس ممنوعہ گروہ کے انفارمیشن ٹیکنالوجی شعبے کا سربراہ بھی شامل ہے۔ پولیس کے مطابق ان مشتبہ افراد کو ڈھاکا کے نواح سے گرفتار کیا گیا جبکہ ان سے اسلحہ بھی برآمد ہوا ہے۔